Ég nenni nú ekki að eyða miklu púðri í að tjá mig um handrukkara innslag Kompás í gærkvöldi. Mér svíður langmest og nær eingöngu að allir séu að tala um handrukkara málið en engin virðist vera að spá í innslaginu sem kom á eftir. Leiðinlegt ef það grefst svona undir.

Það eru nefnilega þvílík tækifæri í kræklingarækt á Íslandi.

Hér má sjá landsblið B-liðsins í frjálsum íþróttum.

Frjóir hugsuðir, miklir íþróttamenn og umfram allt djöfulli myndarlegir.

Hið árlega Hattapartý B-liðsins var haldið hátíðlegt um helgina. Á sunnudeginum sló ég fyrra Íslandsmet í þynnku, ég verð lengi að jafna mig eftir þetta. Ég vil helst kenna bleika stelpudrykknum hans Guffa um þynnkuna sem við vorum að dunda okkur við að drekka sem skot.

Dagurinn byrjaði á Ólympíuleikum B-liðsins þar sem keppt var í frjálsíþróttahöllinni í Laugardal í langstökki, hástökki, 60m spretthlaupi, kúluvarpi og 60m grindarhlaupi.

Ísi átti þvílíka snilldartakta í næstum öllum greinum sem endaði með því að einn þjálfarinn bauð honum að koma á æfingar. Ég sjálfur hafði engu gleymt frá leikfimitímum í Breiðholtsskóla og gat því ekki rassgat. Er einna mest ánægður með góðan tíma í 60m grindarhlaupinu.

Arnar fær þann heiður að eiga frumlegasta hattinn og Hlyni í mínum huga fær heiðursnafnbót fyrir að hugsa 100% inni í kassanum.

Myndir úr Guffabæ má sjá hér.

Þegar íslenska landsliðið í knattspyrnu hefur svona stuðningsmenn ætti árangur liðsins ekki að standa á sér.

Hlyni var öskrandi og vælandi í 90 mínutur á meðan hann uppfærði áfram ísland bloggið sitt og blótaði Baggalút fyrir þetta.

Í fréttum í kvöld var talað um umræður sem sköpuðust á Alþingi um svo kallaðar staðgöngumæður. Eðlileg umræða og þörf og allt það.

Það sem hæstvirtur heilbrigðisráðherra hafði um málið að segja í ræðustóli Alþingis vakti þó athygli mína og í kjölfarið heljarinnar pirring.

Hann sagði að málið yrði að skoða frá heilbrigðissjónarmiðum, lögfræðilegum, siðferðislegum og svo bætti hann við að hann teldi mikilvægt að kirkjan kæmi nálægt þessu sem og almenningur.

Hvurn andskotann hefur kirkjan um það að segja hvort að staðgöngumæður verði leyfðar hér á Íslandi. Eigum við ekki bara að fá álit Biskupsstofu á samningaviðræðum við ljósmæður og hvað eigi að gera með álver á Bakka fyrst að við erum byrjuð.

Phuff, mínus í kladda Guðlaugs Þórs.

Þegar menn hafa tíma og fjármagn til að nostra við hlutina og gera hlutina eftir sínu höfði er auðveldlega hægt að gera myndbönd á heimsmælikvarða.

Klassíkt grín sem ég hef ekki séð lengi og eldist vel.

Sarah Palin, varaforsetaefni Repúblikaflokksins er ekki merkilegur pappír í mínum bókum.

Hún aðhyllist „creationisma“ sem þýðir að hún trúir ekki á þróunarkenningu vísindanna heldur þróunarkenningu Biblíunnar. Við erum sem sagt ekki komin af öpum heldur er allt líf á jörðinni skapað af einum manni. Einmitt það já.

Fyrir utan þetta rugl og bull og vitleysu að þá er hún á móti fóstureyðingum og trúir að það eigi að predika skírlífi í stað kynfræðslu í skólum.

Það hræðir mig að árið 2008 sé kona með svona hugsanir mögulega að fara að verða valdamesta kona í heimi. Það hræðir mig enn meira að það sé fólk þarna úti sem hampar henni og ætlar sér að kjósa hana og McCain. Sama fólk og gerði óða kúrekanum kleift að vera forseti Bandaríkjanna í átta ár.

Yndislegt alveg.

Þegar vindar blása er ekki hægt að leyfa Kára að blása greiðsluna út í veður og vind. Eitt stykki plastpoki reddar því.

Ég gef móður minni stórann plús í minn kladda fyrir að hugsa út fyrir kassann, maður lætur ekki Kára slá sig út af laginu.

Enn og aftur klikkar Patrick Ewing. Maðurinn sem átti að landa titlum fyrir Knicks eins og ekkert væri sjálfsagðara en koxaði alltaf.

Núna klikkar hann á dresskódanum. Maður mætir ekki í stuttbuxum þegar það er verið að vígja mann í Frægðarhöll körfuknattleiksins.

Pat Riley er aftur á móti alltaf óaðfinnanlegur.

Arnar 6ára er í útlöndum og því óhætt að skrifa slæma hluti um N.Y Knicks.

Búin að vera latur, mikið að gera og nóg um að vera bæði í og utan vinnu.

Það virkar ekki að kommenta og ég veit ekki afhverju, þarf að nördast í gegnum það við tækifæri.

Annars bara meira fjör !

Uppfært:

Það virkar að kommenta, auðvitað.

Spurt var í Trivial Pursuit. „Með hvaða liði lék körfuknattleiksmaðurinn Julius Erving ?”.

Það stóð ekki á svarinu hjá íslenska atvinnuflugmanninum.

„Tindastóll”

Af því tilefni sjáum við netta syrpu með stolti Sauðkræklinga. Eins og mig minni að það sé stytta af Doktornum við minni Skagafjarðar.

Eftir tveggja ára þróunarvinnu er tækið loksins komið á markað.

Þetta er það sem bjargar öllum mínum raksturs þörfum.

Ég er afskaplega ánægður með Breiðhylska landsliðið í handbolta á þessum Ólympíuleikum. Þótt að smá andleysi gegn Egyptum í nótt hafi sýnt sig skiptir það litlu, strákarnir eru komnir í 8 liða úrslitin og því ekkert eftir nema að klára dæmið og fara á verðlaunapall. Getan er til staðar, bara spurning um að hausinn sé á réttum stað og þá kemur þetta af sjálfu sér.

Fyrir alla Breiðhyltinga og nærsveitarmenn að þá má benda á þetta hér, lengi lifir í gömlum glæðum og allt það.

Guli herinn er kominn aftur.

Fulltrúi okkar Breiðhyltinga er ekki Tinni í Kongó heldur Dóri í Mósambík.

Það vill líka svo skemmtilega til að Dóri á afmæli í dag sem er kveikjan að þessu bloggi.

Dóri er að hjálpa íbúum Mósambík að klæða sig, gera bbq mat og hvernig best sé að snæða Royal búðing.

Af því tilefni verður birt mynd af Dóra að snæða þennan dýrindis mat sem Royal búðingur er.

Til hamingju með daginn elsku vinur.

Ég veit varla hvar ég á að byrja þetta blogg, þetta er með því steiktara sem ég hef upplifað.

Á miðvikudaginn þegar bongóblíðan var ákvað ég að hætta vinnu á hádegi og taka sólardag, það var ekki annað hægt.

Ég lagði bílnum mínum á Visaplaninu sem er fyrir neðan Visa/Landsbankann á Laugaveginum. Er að labba upp Barónstíginn í átt að L82 (merkt A á mynd) þegar ég heyri þvílíkann skell og brothljóð.

Ég sný mér við og sé vínrauðann Citroen (nr eitt á mynd) vera búin að bakka af öllu afli á Land Crusier jeppa (nr tvö) sem hentist á Volkswagen (nr þrjú) sem hentist svo á Toyota leigubíl (nr fjögur) sem var farinn þegar að myndin var tekin. Brotalínan sýnir hvaðan bíllinn kom.

En ballið er ekki búið ,

Ökumaður bílsins sem var gamall maður með hatt (án djóks) setur því næst í Drive og neglir bílnum aftur í stæðið sem hann var að koma úr (merkt x á mynd), rekst þar að öllu afli á hvíta Yarisinn (nr fimm) sem hendist á bílinn fyrir aftan sig (nr sex), þaðan fer ökumaðurinn á dökku Toyotuna (nr sjö) og þaðan á rauðu Toyoutuna (nr átta) sem hendist á rauða bílinn (nr níu). Hann hafði svo líka rekist í jepplinginn (nr tíu) sem var dældaður á brettinu að framan með brotið ljós.

Þarna stöðvast bíllinn en reykspólar á planinu í sirka 20 sekúndur þangað til að hann stöðvar. Ég veit ekki hvað kom fyrir ökumanninn, hvort að hann hafi fengið aðsvif, flog eða eitthvað álíka en 10 bílar eru tjónaðir.

Það fyndna við þetta allt er bíll merktur númer 11, það er minn bíll en hann hefði verið næsti bíll við þetta allt ef jepplingurinn hefði hreyfst eitthvað af viti. Ég trúi þessu varla enn.

Myndin er stækkanleg og ég þakka allt hrós er varðar teiknihæfileika mína. Jens teiknikennari úr Breiðholtsskóla væri ánægður að sjá að ég teikna jafn vel nú og þegar ég var 8 ára.

Vinnustöðvun leiðbeinenda í Vinnuskóla Reykjavíkur gjörsamlega lamaði þjóðfélagið í dag, og það á mánudegi.

Hvað á þetta eiginlega að þýða ?

Hljómsveitin Bermúda mun falla til jarðar og brenna upp í gufuhvolfinu. Ástæðan er eingöngu sú að ný hljómsveit er komin sem tryllir pöpulinn og er fullbókuð allar helgar út árið.

Hljómsveitin Broddar frá Reykjavík segir hæ !

Þetta er með því skemmtilegra sem ég hef séð lengi.

Dr. Horrible eru net-þættir eftir Josh Whedon, þann sama og gerði Firefly og Serenity.

Krepputal hvað ? Ég tók ekki þátt í neinu góðæri og ég ætla ekki að taka þátt í neinni kreppu.

Því ættu allir færir menn og konur að skella sér á hinn frábæra og fróma vef sem hér verður tengill á og eyða nokkrum krónum.

Þær fara ekki í neina vona menn með bumbur sem reykja vindla og hlæja að almúganum heldur í alvöru menn sem láta sig rétt mál skipta og eru vinir vina sinna.

Einn, tveir og kaupa, kaupa, kaupa.